Укучының мәдәни көндәлеге
Татарстан Республикасы Президенты, Мәдәният, Мәгариф һәм фән министрлыгы тарафыннан гамәлгә ашырыла торган проект кысаларында, районыбызның башлангыч сыйныф укучылары өчен “Мәдәни көндәлек” тапшыру тантанасы узды. Проектның максаты - яшь буын аңында мәдәни кыйммәтләр һәм рухи байлык формалаштырырга ярдәм итү, балаларны төп мәдәни вакыйгалар, республиканың мәдәният учреждениеләре белән таныштыру. 15 сентябрь көнне, республика буенча Бердәм мәдәни дәрес үткәрелде. Районыбыздагы башлангыч сыйныфларда белем алучы 1598 балага мәдәни көндәлекләр тапшырылды. Сарман район китапханәләрендә башлангыч сыйныф укучылары өчен төрле чаралар уздырып, балаларга мәдәни көндәлек турында сөйләделәр. Бу көнне үзәк балалар китапханәсе хезмәткәрләре дә укучылар өчен истә калырлык бәйрәм үткәрделәр. Әлеге чара презентация белән үрелеп барды, балалар өчен бик кызыклы һәм мавыктыргыч бәйрәм, башлангыч сыйныф укучыларына “әле генә табадан төшкән” “Мәдәни көндәлек”ләр тапшыру белән тәмамланды.