Ләке авылында Питрау бәйрәме
12 июль – Питрау бәйрәме көне, яки славяннарның халык календаренда изге апостоллар Петр һәм Павел көне. Бу бәйрәмне христиан динен тотучы халыклар, шул исәптән керәшен татарлары да, зурлап бәйрәм итә. Бүгенге көндә исә Питрау, Сабантуй бәйрәме кебек, бар милләтләрнең бергә җыелып аралашу, күңел ачу чарасы дип әйтсәк тә ялгыш булмас.
Питрау – табигатьне олылау һәм халыкның алда торган урып-җыю эшләре алдыннан ял итеп алу бәйрәме дә.
Бу көнне районыбызның Ләке авылында Изге Апостоллар Петр һәм Павел чиркәвендә бәйрәм келәүе узды. Аннары халык мәйданда Питрауны бәйрәм итте.
Бәйрәм тантанасын авыл җирлеге башлыгы Юрий Антонов ачып җибәрде.
Сарман муниципаль районы Башлыгы Фәрит Хөснуллин авыл халкын, килгән кунакларны бәйрәм белән тәбрик итте. Авыл җирлеге тормышында актив булганнарга бүләкләр тапшырды.
Бәйрәмдә “Керәшен чибәре” конкурсы, көрәш, йөгереш, көянтә-чиләк белән су ташу һ.б. төрле уеннар булды. Җыр булган җирдә, бию дә була. Килгән халык рәхәтләнеп биеде, күңелле ял итте