ЯҢАЛЫКЛАР
Мортыштамак мәктәбенең 7,8 сыйныф укучылары “Сказ гончара” исемле интерактив чарада катнаштылар.
Әлеге мастер-класс -үзеңне чүлмәк ясау остасы итеп тою, үз кулларың белән балчыктан төрле эшләнмәләр, сувенирлар ясау мөмкинлеге ул.
Электән үк әлеге борынгы һөнәрнең осталары хөрмәтле кешеләр булганнар. Чөнки бу эш тырышлыктан тыш әле сабырлык, үҗәтлек, чыдамлылык һәм һәр эшләнмәгә җан җылысын таләп итә. Һөнәр серләрен саклап, буыннан буынга өйрәткәннәр һәм һәрбер гаиләнең үзенең билгеле тамгасы булган.
Вакытлар узган саен керамик эшләнмәләрне башта тимердән, аннан пыяла, пластмассадан ясалган әйберләр кысырыклап чыгара. Ләкин бүгенге көндә яшь буынга борынгы гореф- гадәтләрне өйрәтү программалары нигезендә, һөнәр янәдән актуаль юнәлешләрнең берсенә әйләнде.
Чүлмәкчелек һөнәренең чын остазлары бик аз, безнең районда бөтенләй юк. Кем белә бит, бәлки музейда үткән шөгелләрдән соң, укучылар арасында хезмәт юлын нәкъ менә шушы юнәлеш белән бәйләргә теләүчеләр табылыр. Һәм Сарманыбызда, тирә якка дан тоткан үз осталары булыр.
МББУ "Сарман гимназиясе" нең 2 а сыйныф укучылары Гаилә елына багышланган Бердәм гамәл көне кысаларында уздырылган "Хәтер бизәклә" интерактив чарасында катнаштылар.Чарада Башкарма комитет җитәкчесенең социаль мәсьәләләр буенча урынбасары Индира Рәис кызы Сәхипова да булды. Балалар өчен кунакханәләр өчен аңа бик зур рәхмәт!
Сарман урта гомуми белем бирү мәктәбенең 6 сыйныф укучылары өчен "Сарман урамнары" дип исемләнгән виртуаль экскурсия үткәрелде.
Буш вакытларының һәр минутын күңелле һәм файдалы үткәрергә теләүче балалар өчен, кышкы каникул чорында эбру техникасында рәсем ясау буенча масстер- класслар үткәрелде. Балалар чыршы уенчыкларына һәм открыткаларга багышланган күргәзмә белән дә таныштылар. Элегрәк котлауларны смс язып түгел, ә почта бүлекләре аша махсус котлау открыткаларына тутырып җибәрүләре турында белделәр. Барлык туганнарга, дусларга һәм якыннарыбызга открыткалар җибәрә идек бит. Моның өчен иң матур рәсемле открыткалар сайлап алына иде. Аларны соңыннан әле озак вакыт күңелгә кадерле истәлек итеп саклаганнар. Шөгыль барышында балаларның чиксез фантазиясе су өстенә нинди генә рәсемнәр булып төшмәде: анда йолдызлар җемелдәшкән күк йөзе дә, карлы урман өстеннән күтәрелеп килгән кояш та, кабатланмас кар бөртекләре...һәммәсе дә үз урынын тапты. Үз куллары белән шундый могҗизалар булдыруларына сөенечләре йөзләренә елмаю булып балкып чыкты балаларның.