«Укучының мәдәни көндәлеге-2018» проектына йомгак ясау уңаеннан тантаналы бәйрәм чарасы үтте

15нче май көнне Сарман балалар сәнгать мәктәбендә республика күләмендә үтә торган “Укучының мәдәни көндәлеге” проектына йомгак ясау уңаеннан тантаналы бәйрәм чарасы үтте. 2017-2018 уку елы дәвамында башлангыч сыйныфларда белем алучы балалар мәдәният учрежденияләренә актив рәвештә йөреп, төрле чараларда, бәйгеләрдә катнашып килделәр. Көндәлектәге биремнәрне үтәп, табышмакларга җаваплар табып, рәсемнәр ясап, катнашкан чаралардан алган тәэсирләрен тасвирлап, матур итеп көндәлекләрен тутырып бардылар. Үзәк балалар китапханәсе хезмәткәрләре, әкият геройлары – Пиратлар булып, укучылар өчен истә калырлык бәйрәм үткәрделәр. Алар укучыларга ел дәвамында нинди мәдәни чараларда катнашулары, китапханәдә, музейда, сәнгать мәктәбендә, кинотеатрда, мәдәният йортларында булулары турында сөйләделәр. Бәйрәм барышында «Укучының мәдәни көндәлеге» проектына нәтиҗәләр ясалды, җиңүчеләр билгеләнде. Шул рәвешле иң актив 4 укучыга дипломнар бирелде, бүләкләр тапшырылды. Быелгы җиңүчеләр булып, Шакиров Аяз («Җәлил 2 нче санлы урта гомуми белем бирү мәктәбе»нең 1 “А” сыйныфы укучысы), Шакирова Ралина («Сарман гимназиясе»нең 2 “А” сыйныфы укучысы), Брызгалов Радомир («Сарман гимназиясе»нең 3 “А” сыйныфы укучысы), Бадертдинова Әльфиназ («Сарман гомуми белем бирү мәктәбе»нең 4 “Б” сыйныфы укучысы) табылдылар. «Иң мәдәниятле ата-ана» номинациясендә Гайфуллина Роза Юнусовна җиңүче булды. Ел дәвамында иң күп мәдәни чараларга йөрүчеләр Казан шәһәренә, «Әкият» курчак театрында үтәчәк бүләкләү тантанасына барачак һәм аларга анда курчак театры спектакле күрсәтеләчәк. Сарман узәк балалар китапханәсе китап яраткан, «Укучының мәдәни көндәлеге» проектында катнашкан балаларга һәм ата-аналарга рәхмәт җиткерә.