Җәлил интернат-йортында өлкәннәр көне
Безнең Җәлил поселогында бер урын бар. Аны халык телендә “картлар йорты “ дип йөртәләр. Ә мин аны “изге йорт” диеп атар идем. Чөнки бу йорт бик күпләргә җылылык һәм сыену урыны бирә. Авырган чакта дәвалый, авыр чакта иңен куя, балалары һәм гаиләсе бирә алмаган җан җылысын бирә. Октябрь аеның беренче ункөнлеге безнең илебездә өлкәннәр көне буларак, зурлап билгеләп үтелә. Ә бу йортта ункөнлекләр генә түгел, ел әйләнәсендә алып барыла мондый эшләр.
1 октябрьдә, өлкәннәр көне уңаеннан, күчтәнәчләрен күтәреп, шуларга ук күңел җылысын да кушып, күп кенә кунаклар килгәннәр. Бу көн анда яшәүчеләргә бәйрәм булды. Район үзәгеннән килгән җитәкчеләр Ф.М.Хөснуллин, И.Р. Сахипова, А.М.Харисов, Л.М.Гилметдинова поселок хакимиятеннән Р.А. Каримов, өлкәннәргә саулык, сәламәтлек, җан тынычлыгы теләделәр. Үз кулларыбыз белән Татарстан Дәүләт Советына депутат итеп сайлаган Р.Ф.Комаров иптәш үзе килә алмаса да, күчтәнәчләрен төяп, ышанычлы кешесе И.М.Зубеированы җибәргән.
Бәйрәм мул табыннар артында, Җәлил поселогы культура йорты хезмәткәрләренең матур концертлары белән үрелеп барды. Күптән түгел генә “Халык ансамбле” исемен алган “Родники”, безнең поселок күгендә йолдыз булып кабынган “Гранд” кызлары, җырчы егетләребез Рәис Шәрипов , Румиль Ногманов һәм кызларыбыз матур җырларын бүләк иттеләр. Бәйрәмне Җәлилнең танылган кешесе, Татарстан Республикасының атказанган мәдәният хезмәткәре Нәвия Гатиятуллина алып барды. Матур һәм шаян сүзләре, моңлы җырлары белән өлкәннәрнең дә, безнең дә күңелне күрде.