Герой-якташыбыз Зиннәт Хәсәновка багышланган истәлек тактасын ачу тантанасы
Бүген Иске Кәшер авылында истәлекле вакыйга булды – Ябалактау тавында герой-якташыбыз Зиннәт Хәсәновка багышланган истәлек тактасы ачылды.
Тантаналы чарада Сарман муниципаль районы Башлыгы Фәрит Мөнәвир улы Хөснуллин, Зиннәт Хәсәновның туганы Дамир Илгиз улы Мусин, ТРның атказанган мәдәният хезмәткәре Рәфис Уразаев, Сарман балалар сәнгать мәктәбендә тәрбияләнүчеләр, Зиннәт Хәсәнов исемендәге Иске Кәшер урта мәктәбе укучылары һәм укытучылары, авылдашлары катнашты.
Зиннәт Хәсәнов (1916-1944) ТАССРның Сарман районы Иске Кәшер авылында туа. Җидееллык мәктәпне тәмамлагач, колхозда эшли. Совет сәүдәсе техникумын тәмамлап, товар белгече һөнәрен ала һәм Кировка җибәрелә. Берничә айдан соң 1939 елның көзендә армиягә озатыла.
Кызыл Армиядә кече командирлар курсын тәмамлый һәм лейтенант дәрәҗәсен ала. 1941 елда рота белән командалык иткәндә, немецлар белән бәрелештә Зиннәт Хәсәнов яралана һәм фашистлар әсирлегенә эләгә. Немец әсирлегендә «Идел-Урал» легионына эләгә, легионның яшерен антифашист оешмасына керә. Легионның музыкаль капелласында җырчы һәм укучы-декламатор буларак катнаша, бер үк вакытта легионерлар арасында листовкалар тарата. 1944 елның 25 августында Плетцензее төрмәсендә җәзалап үтерелә.