Мәктәп укучылары эшмәкәрлек нигезләрен өйрәнәләр
«ТИСБИ» Идарә университеты «Һөнәргә кереш» дигән комплекслы хезмәт күрсәтә. Шул максат белән университет белгечләре Сарман районында булдылар.
Хезмәт ике этаптан тора: мәктәп укучылары арасында һөнәри юнәлеш буенча тест үткәрү һәм «Бизнес нигезләре»программасы буенча укыту. Башта мәктәп укытучылары һәм университет хезмәткәрләре 10-11 сыйныф укучыларына дүрт блок буенча һөнәри диагностика үткәрделәр: икътисадый, сәүдә-технология, таможня эше, сервис һәм хезмәт күрсәтү өлкәсе.
Нәтиҗәләр күрсәткәнчә, кайбер укучылар, яшьтәшләре белән чагыштырганда, төрле өлкәләрдә эшмәкәрлек эшчәнлеге белн мавыгалар һәм бизнеста үз-үзеңне тоту өчен кирәкле мөмкинлекләргә ияләр. Сәләтен үстерергә һәм үз бизнес-идеяләрен тормышка ашырырга теләгән кешеләрне «Бизнес нигезләре»программасының төркем дәресенә чакырдылар. Дәрес Сарман гимназиясе базасында узды.
«Бизнес нигезләре» программасы укучыларга эшкуарлыкның социаль-икътисадый асылын ачыкларга, бизнес нигезләре турында күзаллаулар алырга, маркетинг һәм менеджмент нигезләрен белергә ярдәм итте. Моннан тыш, укучылар нәтиҗәле аралашу, эшлекле сөйләшүләр һәм конфликтология күнекмәләрен алдылар.