Сарман районында авыл территорияләрендә халыкның эшлекле активлыгын арттыру мәсьәләләре буенча фикер алыштылар
Сарман районында авыл территорияләрендә халыкның эшлекле активлыгын арттыру мәсьәләләре буенча фикер алыштылар Бүген Татарстан Республикасы Сарман муниципаль районында авыл халкының эшлекле активлыгын арттыру мәсьәләләре буенча чираттагы зона семинар-киңәшмәсе узды. Анда Татарстан Республикасы Дәүләт Советы Рәисе урынбасары Марат Готыф улы Әхмәтов, Татарстан Республикасы Премьер-министры урынбасары — Татарстан Республикасы Авыл хуҗалыгы һәм азык-төлек министры Марат Азат улы Җәббаров, «ТР Муниципаль берәмлекләре Советы» Ассоциациясе рәисе Әгъзам Самат улы Гобәйдуллин катнашты. Семинар-киңәшмәнең пленар өлешендә Марат Готыф улы сөйләгәнчә, узган елларда мондый семинар-киңәшмәләрне барлык муниципаль районнар да уздырган. «Сезнең белән бергәләп республика законнарын камилләштерү, кече агробизнеска ярдәм итүнең өстәмә чараларын эшләү, авыл халкының социаль һәм эшлекле активлыгын стимуллаштыру буенча конкрет тәкъдимнәр әзерлибез», – диде ул. Марат Азат улы шәхси ярдәмче хуҗалыкларга ярдәм юнәлешләре турында сөйләде. «2025 елга 711 млн сум каралган, бу узган елга караганда 262 млн сумга күбрәк", - дип ассызыклады Марат Җәббаров. Фәрит Мөнәвир улы Сарман муниципаль районының социаль-икътисади үсеше, районда гамәлгә ашырыла торган дәүләт программалары турында доклад белән чыгыш ясады.