Сарман урта мәктәбендә Белем көне
Сарман районында бүген Белем көненә багышланган тантаналы линейкалар узды. Бүген 300 беренче сыйныф укучысы өчен яңа уку елы башлану билгесе булган кыңгырау яңгырады.
Сарман урта мәктәбендә бүген Белем көненә багышланган линейка узды. Тантаналы чарада Сарман муниципаль районы Башлыгы Фәрит Мөнәвир улы Хөснуллин, Сарман районы прокуроры Алексей Николаевич Панишев, Башкарма комитетның социаль мәсьәләләр буенча җитәкчесе урынбасары Индира Рәис кызы Сәхипова, Башкарма комитетның мәгариф бүлеге җитәкчесе Гөлназ Тәлгать кызы Исмәгыйлова катнашты.
Мәктәп директоры Лилия Рәис кызы Газимова үзенең чыгышында мәктәпнең күп еллар дәвамында ничек эшләве, педагогларның һәм укучыларның нинди казанышлары турында сөйләде. Ул җыелучыларны Белем көне белән котлады һәм барысына да сабырлык, яңа уку елында уңышлар теләде.
Укытучыларны, ата-аналарны һәм укучыларны Белем көне белән Сарман муниципаль районы Башлыгы Фәрит Мөнәвир улы Хөснуллин котлады. Ул барысына да сәламәтлек, һәртөрле уңышлар, бәхетле мизгелләр теләде һәм башланган уку елы балаларның белемнәрен тулыландырып кына калмыйча, аларга якты тәэсирләр һәм яңа казанышлар да китерер дигән ышаныч белдерде. Фәрит Мөнәвир улы беренче сыйныф укучыларына мәктәп кирәк-яраклары тапшырды.
Тантаналы линейка беренче сыйныф укучылары чыгышлары белән дәвам итте, алар бәйрәмгә көчле алкышлар астында керделәр. Шуннан соң беренче кыңгырау яңгырады, ул яңа уку елы башлануын хәбәр итте.