Россия Федерациясе Дәүләт Думасы депутаты А.Ф. Ягафаровның Сарман районына эшлекле визиты
Сарман районына эшлекле визиты белән Россия Федерациясе Дәүләт Думасы депутаты Азат Фердинанд улы Ягафаров килде. Сәфәр барышында аны Сарман муниципаль районы Башлыгы «БЕРДӘМ РОССИЯ» партиясенең җирле бүлекчәсе секретаре Фәрит Мөнәвир улы Хөснуллин озата йөрде.
Визит программасына капиталь ремонттан соң төп социаль һәм мәдәни объектларны карау кертелгән иде. Парламентарий беренче чиратта 50 балага исәпләнгән «Олимпия өметләре» балаларны савыктыру лагерен карады, подрядчы, хакимият вәкилләре белән аралашты, лагерь инфраструктурасының алга таба үсеше турында фикер алышты.
Аннары Азат Фердинандович халыкны эш белән тәэмин итү үзәгенең бүлегендә һәм капиталь ремонттан соң ачылган район үзәк китапханәсендә булды. Депутат башкарылган эшләргә югары бәя бирде, китапханә фондын сирәк басмалар белән тулыландырды: Кызыл китаплар бүләк итте.
Азат Фердинандович шулай ук Сарман авыл җирлеге башкарма комитетының яңа бинасында булды. Объект 2016 елдан гамәлгә ашырыла торган башкарма комитет биналарын капиталь ремонтлау һәм төзү буенча республика программасы нигезендә төзелгән.