15 декабрь яңалыклары

17 декабрьдә 10.00 сәгатьтән «Сарман» кинотеатры бинасында бишенче чакырылыш Татарстан Дәүләт Советы депутаты Наил Маганов гражданнарны кабул итәчәк. Белешмәләр өчен телефоннар: 2-47-93, 2-58-74.

Кичә “Шәфкать” үзәгендә ял итүчеләр Чураш авылында яшәп иҗат итүче шагыйрә, мәгариф эше ветераны Вәсимә Хәйруллина белән очраштылар. Үзәкнең мәдәни эшләрне оештыручысы Илгизә Салахова Вәсимә апаның тормыш юлы, иҗаты белән таныштырды, шагыйрәгә кызыклы сорауларын бирде. Үзәктә ял итүчеләр арасында Вәсимә апаның Минзәлә педагогия училищесында бергә укыган курсташлары да бар иде. Әлмәт районы Габдрахман авылыннан килгән Флера Гыймазова, Чураштан Люция Хәбибуллина һәм Куҗактан шагыйрә иҗатына гашыйк Вәсилә Сәлимгәрәева аның хакында җылысүзләрен әйттеләр, сәнгатьле итеп шигырьләрен сөйләделәр. Вәсимә апа үзе дә очрашуга буш кул белән килмәгән – күчтәнәчкә соңгы вакытта иҗат иткән шигырьләрен алган. Ул шуларны укыды. Очрашу чынмәгънәсендә шигърият кичәсе булды.

Районда Яңа ел бәйрәмен югары әзерлектә уздыру максатыннан, чаралар планы кабул ителде. Анда оешма, учреждениеләр арасында биналарны бизәү һәм Ял паркында фигуралар ясау буенча конкурс игълан ителү турында да пункт бар. Конкурста җиңүчеләргә муниципаль район Башкарма комитетының дипломнары һәм бүләкләр тапшырылачак.

Безне Яңа ел башында озын каникуллар көтә: 1январьдан 11енә кадәр ял итәчәкбез. Хезмәт кодексының 112нче маддәсе нигезендә 1 январьдан 6 сына кадәр һәм 8 январь Яңа ел бәйрәм көннәре исәпләнә. 7 январь – Раштуа бәйрәме. Әмма яллар моның белән генә бетми: шимбәгә туры килүче 3 январь ялы җомгага – 9 январьга күчерелә, ә 10 һәм 11 январь – шимбә, якшәмбе яллары. Шулай итеп, эшкә 12 январьда чыгабыз. Мәктәп укучылары ике атна ял итә, аның вакытын һәр мәктәп үзе дә билгеләргә хаклы.