Хәбәрләр

Ватанны саклаучылар көне белән!
23 февраль – кыюлык, каһарманлык һәм ватанпәр-вәрлек символы булган бәйрәм – Ватанны саклаучылар көне. Ул безгә әти-бабаларыбызның чиксез батырлыклары турында искәртеп тора. Бу көнне котлау сүзләре иң югары мөнбәрләрдән әйтелә. Бәйрәм уңаеннан райондашларны район Башкарма комитеты җитәкчесе Фәрит ХӨСНУЛЛИН да котлый. «Ватанны саклаучылар көне – һәр Россия гражданины өчен әһәмиятле бәйрәмнәрнең берсе. Бу көнне без Ватанга хезмәт итүчеләрне, сугыш юллары үткән әтиләребезне һәм бабаларыбызны, шулай ук Ватан өчен ант бирергә җыенучыларны олылыйбыз, - диелә аның котлау хатында. - Кораллы Көчләребезнең героик елъязмасын, буыннарның аерылгысыз элемтәсен, Ватанга фидакарь хезмәт итү традицияләренең дәвамчанлыгын гәүдәләндерә бу бәйрәм. Халык илгә тугры хезмәт иткән бөек полководецларның, гади солдатларның тиңдәшсез батырлыкларын беркайчан да исеннән чыгармый. Аларның каһарманлыгы алдында без баш иябез. Хәрби хезмәткәрләрнең бүгенге буыны, армия сафларын тулыландырырга әзерләнүчеләр илебезнең иминлеге, якын кешеләренең тормышы өчен җаваплылык хисен югалтмасыннар иде. Хөрмәтл райондашлар! Сезне Ватанны саклаучылар бәйрәме белән котлыйм. Ныклы сәламәтлек, гаилә иминлеге, бәхетле, мул тормыш телим».

Бәйрәм уңаеннан котлау сүзләрен район үзәгендәге «ЭЛЕКТРОНИКА» кибете коллективы да җиткерә. «23 февраль көнне илебез төп бәйрәмнәрнең берсен –Ватанны саклаучылар көнен билгеләп үтә. Иңнәренә погон таккан хәрбиләребезнең генә түгел, «Туган ил», «Ватан», «бурыч» дигән сүзләргә битараф булмаган һәрбарчабызның бәйрәме бу. Барыгызны да Ватанны саклаучылар көне белән эчкерсез котлыйбыз! Сезгә һәм сезнең гаиләләргә тыныч күк йөзе, ныксәламәтлек, уңышлар, оптимизм һәм иртәгәсе көнгә ышаныч телибез!»

Рәхмәт хатлары тапшырылды
Районда ветераннар хәрәкәтен җәелдерүгә зур өлеш кертүе, мәгариф тармагында озак еллар куйган намуслы хезмәте өчен һәм юбилее уңаеннан Ахунова Дилара Әхмәт кызына муниципаль район башлыгының Рәхмәт хаты тапшырылды. Шундый ук Рәхмәт хатына авыл хуҗалыгы өлкәсендә озак еллар тырыш хезмәт куйган, аның терлекчелек тармагын үстерүгә зур өлеш керткән хезмәт ветераны Гамиров Өнип Гамир улы лаек булды.

Сарман аграр көллиятенең спорт залын төзүдә актив катнашканнары, һәрьяклы ярдәм күрсәткәннәре өчен «ТехСтрой» төзелеш компаниясе баш инженеры Агапов Дмитрий Николаевич, компаниянең директор урынбасары Нәҗипов Илназ Рифхать улы, баш энергетик Сергеев Михаил Владимировичка муниципаль район башлыгының Рәхмәт хаты тапшырылды. Сарман аграр көллияте базасындагы ресурс үзәгенә капиталь ремонт уздыруда һәрьяклы ярдәмнәре һәм актив эшләүләр өчен «ИП Вагизов» хезмәткәре Зарипов Айдар Мирсәет улы, Клюев Владимир Михайлович, Сафин Фәнүс Әюп улы муниципаль район башлыгының Рәхмәт хаты белән бүләкләнделәр.

Теннис турниры бара
Бүген Сарман муниципаль районы укучылары Спартакиадас кысаларында 1997 елгы һәм аннан яшьрәк егетләр арасында өстәл теннисы буенча команда беренчелеге үтә. Кичә өстәл теннисы турнирында шул ук яшьтәге кызлар көч сынаштылар. Ярышлар Сарман гимназиясендә үткәрелә.

Депутатка соравыгыз булса
24 февральдә13.00 сәгатьтән 15.00 сәгатькә кадәр Җәлил поселок советы бинасында (Әхмәдиев урамы, 26 нчы йорт) бишенче чакырылыш Дәүләт Советы депутаты Наил Магановның ярдәмчесе Рөстәм Гарипов халыкны кабул итәчәк. Алдан язылу өчен телефон: 31-097.