ЯҢАЛЫКЛАР

9 декабрь көнне “Петровка завод урта гомуми белем бирү мәктәбе” укучылары Бөек Ватан сугышы һәм туган якны өйрәнү музеенда булдылар. Алар, Татарстан Республикасы Хөкүмәтенең муниципаль мәдәният учреждениеләренә ярдәм итү буенча грантлар конкурсы җиңүчесе булган- «Үз илемдә-үз телемдә» проектын тормышка ашыру кысаларында  үткәрелүче «Талчыбык серләре» дип исемләнгән  бик кызыклы һәм мавыктыргыч мастер –класста катнаштылар.

Безнең мастер-классларда төрле һөнәр техникасына гына өйрәнеп калмыйлар, очрашу барышында кызыклы, тарих битләрендә сакланган гыйбрәтле фактлар белән дә танышалар. Эш вакытында алар бик теләп үз фикерләре белән уртаклашалар, сорауларга актив җавап бирәләр.

Бүген исә, сүз шундый чаралар ни өчен кирәк булуы хакында барды. Фикерләр бихисап күп иде. Әңгәмәбезне йомгаклап, ата-бабаларыбызның гореф-гадәтләрен хөрмәт итү, халыкның мәдәни, рухи мирасын саклау һәм арттырыру безнең һәммәбезнең дә бурычы дигән нәтиҗә ясадык.

Укучылар әңгәмә барышында, үз фикерләре белән уртаклашкан арада, эшләнмәләрен ничек төгәлләүләрен сизми дә калдылар. Алар бүгенге очрашу истәлеге итеп, үз куллары белән кәгазь лозадан ясаган кәрҗиннәрне алып киттеләр.

Әлбәттә, бүгенге көндә инде беребез дә өйләребездә туку станнары артында утырып күлмәклек тукыма тукымыйбыз. Керосин лампалары яктысында бишек, каз оялары, кәрҗиннәр дә үреп утыручыларны тапмассың.  Ә кайчандыр, тукучылык, үрү һәм башка күп кенә һөнәрләрдән башка көн -күрешне бөтенләй күз алдына да китереп булмаган. Бүгенге көндә исә без, барлык кирәк яракларыбызны барабыз да кибеттән генә сатып алабыз.

Шуңа күрә һөнәрчелекнең күп кенә тармаклары заманалар алга барган саен онытылып бара. Дөрес, яңача, заманча тормышыбызда аларның әһәмияте бөтенләй юк диярлек. Ләкин үсеп килүче буынны тәрбияләүдә алар бүгенге көндә бик актуаль юнәлеш булып торалар. Чөнки балалар үз куллары белән орчык тотып йон җегерләп, туку станында эшләп карасалар, үрү һөнәрчелегенең серләренә төшенсәләр, алар һичшиксез тирә-юньгә карата сак карарга, булганының кадәрен белергә өйрәнәчәк. Шуңа күрә  яшь буынны татар халкының мәдәни кыйммәтләре, милли гореф-гадәтләре белән таныштыру музей эшчәнлегенең бурычы булып тора.

«Үз илемдә –үз телемдә»  проектын гамәлгә ашыру кысаларында үткәрелүче, “Талчыбык серләре” дип исемләнгән интерактив шөгыльнең дә өстенлекле бурычы- укучыларны милли кыйммәтләр белән таныштыру.  Чираттагы очрашу Петровка заводы утра гомуми белем  бирү мәктәбенең 8-9 сыйныф укучылары белән үткәрелде. Әйтергә кирәк, кәгазьдән үрү дә бер дә җиңел бирелми, ә бит борынгылар махсус рәвештә, сайлап-сайлап кына тал чыбыклар әзерли торган булганнар. Балалар бик яратып, күңел биреп эшләделәр, әлбәттә, балаларның һәр эшнең рәтен белергә, һәр һөнәрнең серенә төшенергә һәм барсының да куелган максатка җитди карашлары булу сөендермәскә мөмкин түгел. Очрашудан бары тик якты, җылы хисләр генә калды.

"Они защищали отчий дом" проектын гамәлгә ашыру кысаларында  музей хезмәткәрләре районыбыз мәктәпләре укучылары белән очрашуларны дәвам итәләр. “Россия – минем Ватаным” темасына багышланган әңгәмәдә  Сарман урта гомуми белем бирү мәктәбенең 5 сыйныф укучылары катнашты.

Бөек Ватан сугышы һәм туган якны өйрәнү музее хезмәткәрләре әңгәмә-лекцияләр циклын дәвам итәләр. Чираттагы очрашу «Россия – минем Ватаным» темасына багышланды, анда Сарман гимназиясенең югары сыйныф укучылары катнашты. Чара "Они защищали отчий дом" проектын тормышка ашыру кысаларында оештырылды.

«Үз илемдә –үз телемдә» проектының өстенлекле бурычы - укучыларны татар халкының мәдәни кыйммәтләре, милли гореф-гадәтләре белән таныштыру. Шул максат белән проектны тормышка ашыру кысаларында «Тәгәри китте йомгагым» дигән мастер-класс үткәрелде.

Чарада катнашкан укучыларның һәрберсе каба, орчык тотып җеп җегерләп, аннан туку станогында эшләп карадылар. Мондый чаралар тарих, гореф-гадәтләр белән танышу белән генә чикләнми, алар балаларны әйләнә-тирә дөньяга сакчыл карарга өйрәтә.

Сарман районының «Татарстан Республикасы инвалидлар җәмгыяте» һәм «Бөек Ватан сугышы һәм туган якны өйрәнү музее» «Стрела наследия» дип исемләнгән уртак проекты 2021 елда социаль әһәмиятле проектларны тормышка ашыруда катнашучы коммерцияле булмаган оешмалар өчен Татарстан Республикасы Министрлар Кабинеты грантларын алуга республика конкурсында «Духовно-нравственное и патриотическое воспитание детей и молодежи» номинациясендә җиңүче булды.

«Стрела наследия» проектын тормышка ашыру мөмкинлекләре чикләнгән балаларны җәмгыятькә интеграцияләү, аларның иҗади сәләтләрен ачу механизмнарының берсе булачак. Балаларда җәмгыятьнең тискәре юнәлешләренә каршы тору сәләтләрен үстерә, актив тормыш позициясе формалаштырыла. Шулай ук мөмкинлекләре чикләнгән яшьләрнең сәламәт яшьтәшләре белән иҗади контактлары да киңәйтеләчәк. Проектны тормышка ашыру мөмкинлекләре чикле балалар белән эшләү дәрәҗәсендә районара хезмәттәшлекне үстерүгә һәм ныгытуга зур өлеш кертәчәк.

«Стрела наследия» проектына грант ярдәме 306 870 сумны тәшкил итәчәк.

 “Бөек Ватан сугышы һәм туган якны өйрәнү музее” Татарстан Республикасы Хөкүмәтенең  “2021 -Татарстан Республикасында туган телләр һәм халыклар бердәмлеге елы” кысаларында телләр күптөрлелеген саклауга юнәлдерелгән проектларны һәм чараларны гамәлгә ашыруда муниципаль мәдәният учреждениеләренә ярдәм итүгә юнәлтелгән грантлар бәйгесенең «Инновационный подход в реализации проектов в национальном  театральном искусстве, развитие и поддержка татарского языка» номинациясендә җиңүче булды.

«Үз илемдә-үз телемдә» проектына грант ярдәме 500 000 сум тәшкил итәчәк.

Ватанга мәхәббәт-цивилизацияле кешенең беренче өстенлеге…

Патриотизм тарихның авыр чорларында халыкка кыенлыкларны җиңәргә ярдәм итүче төп берләштерүче фактор булган. Әгәр дә гражданнар тарихи мирасны баету һәм арттыру, Ватаннарына, мәдәни һәм тарихи кыйммәтләргә сакчыл караш тоймаса, җәмгыять цивилизацияле дип санала алмый.

"Они защищали отчий дом" проектының максаты - укучыларда гражданлык, патриотик хисләр тәрбияләү,  актив тормыш позициясе формалаштыру.

Проектның 1 этабын тормышка ашыру кысаларында районыбызның гомуми белем бирү мәктәпләре укучылары белән әңгәмә-лекцияләр үткәрелә. 11 ноябрь көнне Сарман урта мәктәбенең 9 А сыйныф укучылары белән «Есть ли герои в наше время?» дигән темага очрашу узды.

Ватанга мәхәббәт гаиләдән, өлкәннәрне хөрмәтләүдән, тугры дус булудан, тирә-юньдәге бар нәрсәгә сакчыл мөнәсәбәтеннән, якташларыңның батырлыклары һәм күренекле казанышлары өчен горурлык хисләреннән башлана. Патриотизм каядыр еракта, ил чикләрендә түгел - һәрберебезнең йөрәгендә ул. Үсеп килүче буынны бу рухта кечкенәдән үк тәрбияләргә кирәк.

Патриотик тәрбия кешенең социаль һәм рухи үсешендә зур әһәмияткә ия. Нәкъ менә шуңа күрә "Они защищали отчий дом" проектын тормышка ашыру этапларының берсе - бүгенге көндә аеруча актуаль булган патриотик тәрбия темасына багышланган әңгәмәләр циклы.

Бөек Ватан сугышы һәм туган якны өйрәнү музее хезмәткәрләре  чираттагы әңгәмә-лекциядә Сарман гимназиясенең 8А сыйныф укучылары белән очраштылар.

Бөек Ватан сугышы һәм туган якны өйрәнү музее хезмәткәрләре Сарман гимназиясенең 6 нче сыйныф укучылары өчен "Герои нашей истории" дигән темага әңгәмә - лекция үткәрделәр. Ул район тарихында гына түгел, гомумән ил тарихында эз калдырган герой шәхесләрне таныштыру һәм өйрәнүгә багышланган иде. Фронтта да, тылда да якташларыбызның батырлыгы - үсеп килүче буын өчен лаеклы үрнәк, Ватаныбызга чиксез мәхәббәт һәйкәле. Чара "Они защищали отчий дом" проектын тормышка ашыру кысаларында оештырылды.