«Соры» эш базарына контроль көчәйтелде

Халыкның тормыш дәрәҗәсен күтәрү һәм керемнәрне легальләштерү буенча район ведомствоара комиссиясе эш бирүчеләрнең хезмәт законнарын бозганнары, шул исәптән хезмәткәрләр белән мөнәсәбәтләрне рәсмиләштермәгән яки тиешенчә рәсмиләштермәгәннәре өчен җаваплылыгын даими игътибар үзәгендә тота.

2015 елның 1 январеннән Россия Федерациясенең Административ хокук бозулар турындагы кодексына эш бирүчеләрнең хезмәт законнарын һәм хезмәт хокукы нормаларын эченә алган башка төр хокукый актларны бозган өчен җаваплылыкларын арттыруны күздә тоткан үзгәрешләр кертелде. Бу өлкәдә кагыйдә бозуларны булдырмау максатыннан, халыкның тормыш дәрәҗәсен күтәрү һәм керемнәрне легальләштерү буенча район ведомствоара комиссиясе ел башыннан уннан артык утырыш уздырды. Ул утырышларга хезмәткәрләре белән хезмәт килешүләре төземәгән яисә кагыйдә бозулар белән төзегән «проблемалы» эш бирүчеләр чакырылды. Барлыгы утыз эш бирүченең эше каралды. Нәтиҗәдә аларның күпчелеге хезмәт килешүләре төзеделәр (200ләп хезмәт килешүе төзелде), пенсия фондында, салым һәм социаль иминият органнарында теркәлделәр. Кисәтүләргә карамастан, эшчәнлекләрен хезмәт турындагы законнарны бозып, хезмәт килешүләре төземичә дәвам итүче эш бирүчеләр прокуратура тарафыннан административ җаваплылыкка тартылырга мөмкиннәр. Ә хокуклары бозылган хезмәткәр бу турыда 2-54-41 «кайнар» линия телефоны буенча хәбәр итә ала.

Зөлфия САФИНА,халыкның тормыш дәрәҗәсен күтәрү һәм керемнәрне легальләштерү буенча район ведомствоара комиссиясе әгъзасы.