ЯҢАЛЫКЛАР

Хөрмәтле райондашлар, укытучылар, тәрбиячеләр, әти-әниләр! Кадерле балалар!

Сентябрь аеның беренче көне һәр бала күңеленә иң матур бәйрәмнәренең берсе булып кереп каладыр. Чөнки 1 сентябрь – мәктәп бусагасын атлап кергән көн генә түгел, серле белем дөньясына, яңа ачышлар иленә юл башы да. Белем бәйрәменең һәрберебез өчен дә әһәмияте зур: кеше бу тормышта нинди генә баскычларга күтәрелсә дә, нинди һөнәр иясе булса да, барлык уңышларының нигезе мәктәптә салына.

Мәгариф тармагындагы эшчәнлекне тагын да яхшыртырга, балаларга белем һәм тәрбия бирү сыйфатын күтәрергә ярдәм итү өчен Президентыбыз Рөстәм Нургали улы Миңнеханов һәм Хөкүмәтебез тарафыннан бөтен мөмкинлекләр дә тудырылган. Мәгариф учреждениеләрен төзү һәм төзекләндерү, аларның материаль-техник базаларын, автопаркларын яңарту, укытучыларга яңа ноутбуклар бирү - бу юнәлештә сөенечле күренеш. Бүген районыбызның барлык белем бирү учреждениеләре яңа уку елына әзер.

Кадерле балалар, мәктәп кыңгыравы бүген сезнең өчен яңгырый. Алдыгызда яңа, кызыклы уку елы. Мәктәп сезне туган илебезне яратырга, бөек илебезнең лаеклы гражданнары булырга өйрәтер. Дуслык, Намус, Туган ил кебек сүзләрнең тирән мәгънәсенә төшендерер. Белем дөньясында югалып калмагыз, батыр булыгыз. Тырышып укыгыз, мәктәптә үткән һәр көнегезнең кадерен белегез. Бу уку елы кызыклы вакыйгаларга һәм иҗади табышларга юмарт булсын.

Хөрмәтле укытучылар, сезнең хезмәтегез зур сабырлык сорый. Яңа уку елы сезгә яңа уңышлар алып килсен. Куйган хезмәтегез өчен зур рәхмәт сезгә. Аерым рәхмәт сүзләрем мөхтәрәм мәгариф ветераннарына.

Хөрмәтле әти-әниләр, балаларыгызның үсеп буйга җитүен, мәктәптә яхшы укуларын, илебезнең лаеклы гражданнары булуын күреп шатланырга язсын сезгә.

Барыгызны да тагын бер кат Белем бәйрәме белән тәбрик итәм. Ныклы сәламәтлек, имин тормыш телим.

30 август көнне Мортыштамак авылында Татарстан Республикасы көненә багышланган бәйрәм чарасы үтте. Бәйрәм Дамир Әхмәтов исемендәге спорт һәм ял паркында оештырылды. Татнефть грантына төзелгән яңа спорт мәйданында яшүсмерләр арасында баскетбол ярышы да булды. Котлаулар, дәртле җырлар, күчтәнәчләр белән самовар чәе эчү авылдашларга, килгән кунакларга, балаларга бик ошады.

2022 елның 31 августында Казанда КУЭ корпорациясе Татарстан Республикасы Хөкүмәте белән берлектә төбәк эшмәкәрләре белән агымдагы шартларда бизнес очраша торган актуаль мәсьәләләр буенча фикер алышу өчен ачык диалог уздырачак. Чара МСП Корпорациясе Генераль директоры урынбасары - статс-секретарь Наталья Коротченкова һәм Татарстан Республикасы Премьер-министры урынбасары - ТР икътисад министры Мидхәт Шаһиәхмәтов катнашында узачак.

Бүген Сарман авылы үзәк паркында Татарстан Республикасы көнен бәйрәм иттеләр. Район башлыгы Фәрит Хөснуллин исеменнән җыелган халыкны район башлыгы урынбасары Гүзәл Гәрәева сәламләде, Сарман муниципаль районы башлыгының Рәхмәт хатларын, истәлекле бүләкләр тапшырды. Чара концерт номерлары, бәйрәм дискотекасы белән дәвам итте.

Бүген Җәлил бистәсендә Татарстан Республикасы көне һәм нефть һәм газ сәнәгате хезмәткәрләре көне уңаеннан бәйрәм уза. Чараларда Сарман муниципаль районы башлыгы Фәрит Хөснуллин катнашты. Ул бәйрәмнәр белән котлады, куелган максатларга ирешүдә уңышлар, нык сәламәтлек, тынычлык һәм тантанада катнашучыларның барысына да иминлек теләде. Мактау грамоталары һәм Рәхмәт хатлары тапшырды. Район халкы үз гомерләрен кара алтын чыгаруга һәм эшкәртүгә багышлаган геройлары белән горурлана. Нефтьчеләр ярдәме белән районда күп кенә социаль мәсьәләләр хәл ителә, объектлар, юллар, чишмәләр төзекләндерелә. Алар сәламәтлек саклау, мәгариф, мәдәният һәм спорт өлкәләренә зур ярдәм күрсәтә.

Татарстан Республикасы Көнендә Сарман муниципаль район Башлыгы Фәрит Хөснуллин хезмәт ветераны Нәкыйф Фатыйх улы Вәлиевка Дәүләт бүләге тапшырды.

Татарстан Республикасы Президенты Указы нигезендә Татарстан Республикасының социаль-икътисадый потенциалын ныгытуга зур өлеш кертүе һәм күпьеллык нәтиҗәле хезмәте өчен Нәкыйф Фатыйх улы Вәлиев «Татарстан Автономияле Совет Социалистик Республикасы төзелүгә 100 ел» медале белән бүләкләнде.

Хөрмәтле райондашлар! 

Барыгызны да чын йөрәктән Татарстанның төп бәйрәме – Республика көне белән тәбрик итәм! 

1990 елның 30 август көне республикабыз үсешенең яңа юнәлешен билгеләгән мөһим вакыйга булып тарихка керде. Татарстан Республикасында Дәүләт суверенитеты турында декларация кабул ителүенә 32 ел вакыт узды.

Шушы вакыт эчендә Татарстан Республикасы киләчәккә омтылучы алдынгы республика буларак дөньяга танылды. Шунысы аеруча кадерле: республикада яшәүче халыкларның бер-берсенә карата толерантлы булуы саклап калынды. Сәяси һәм иҗтимагый стабильлек, төрле милләт һәм конфессияләр арасында тынычлык һәм дуслык – Татарстанның суверенитет юлында иң зур казанышы дип әйтер идем. Шуңа күрә Республика көне аның барлык күпмилләтле халкының уртак бәйрәме.

Республика уңышлары безнең район тормышында да чагылыш таба.

Республикабыз җитәкчелеге ярдәме белән торак йортлар, балалар бакчалары, мәктәпләр, авыл клублары, спорт һәм сәламәтлек саклау объектлары төзелә һәм ремонтлана, иҗтимагый киңлекләр төзекләндерелә, юллар салына. Бүгенге көндә районда урып-җыю эшләре тулы куәтенә бара. 

Авыл җирлекләрендә социаль әһәмияткә ия программаларны тормышка ашырып, тыныч һәм имин республикада яшәү мөмкинлеген тәэмин иткән Президентыбыз Рөстәм Нургалиевич Миннихановка, Дәүләт Советы, Министрлар Кабинетына барлык райондашлар исеменнән рәхмәт сүзләремне җиткерәм.

Хөрмәтле райондашлар, сезгә районыбыз, республикабызны үстерүгә-ныгытуга керткән лаеклы өлешегез, фидакарь хезмәтегез өчен олы рәхмәтемне белдерәм. 

Бәйрәм белән котлап, Татарстаныбызга, районыбызга яңа уңышлар, халкыбызга матур киләчәк телим. Үзебез сау-сәламәт, дөньялар тыныч булсын.

Бүген, 2022 елның 29 августында Казан Экспо халыкара күргәзмә үзәге мәйданында Татарстан Республикасы Президенты Р.Н. Миңнеханов катнашында Татарстан Республикасы муниципаль берәмлекләре арасында республика смотр-конкурсында җиңүчеләрне бүләкләүгә багышланган тантаналы чара узды. Анда район башлыгы Ф.М.Хөснуллин, Конкурста җиңүчеләр - Рангаз авыл җирлеге башлыгы А.Р.Шәрипова, Сарман авыл җирлеге башкарма комитеты җитәкчесе Н.И.Сахуриев катнашты. Рангаз һәм Сарман авыл җирлекләренең башкарма комитетларына җиңел автомобильләрдән ачкычлар тапшырылды.

Вилдановлар гаиләсенең алтын туйлары

Бүген район башлыгы Фәрит Хөснуллин урып-җыю кампаниясенең чираттагы биш көнендә җиңүчеләрне бүләкләде.